政壇：搞搞政：拒交車公廟業權 德成局長有難

繼新界村屋僭建問題搞到村民火燒發展局局長林鄭月娥嘅紙公仔後，沙田原居民同民政事務局隨時又可能爆大鑊。沙田鄉事委員會今早將召開村代表大會討論車公廟業權事宜，主席莫錦貴尋日警告，如果民政局再唔派人同佢哋傾，下次肯定就喺法庭見。咁即係話局長曾德成隨時成為下個箭靶，但莫錦貴話暫未計劃燒德成局長嘅紙公仔。

本報早前獨家報道，沙田鄉委會質疑政府喺近八十年強搶本來屬於當區原居民嘅車公廟業權，近年積極進行追討，但民政局一於少理，逾一年都拒絕正式答覆，認真冇禮貌同鬼祟。

莫錦貴重申爭業權係為咗「正名」，從冇諗過將間廟改做骨灰龕牟利，爭取成功嘅話亦會成立慈善信託基金，邀請政府監察車公廟嘅運作同收入。佢強調打官司冇人可以預知最後邊個贏，依家係埋枱傾嘅最好時機，最擔心係是旦有個原居民走出嚟告政府，甚至採取更激烈嘅行動，到時無論邊個出聲都未必㩒得住：「個個都係持份者，一定唔少人肯行出嚟！」