廣東驗出毒海產 港官依然一舊飯

有首打油詩講出好多內地同胞心聲：「吃動物怕激素，吃植物怕毒素，喝飲料怕色素，還能夠吃甚麼？心裏真的沒數！」家陣又添多劑喇，就係吃海鮮怕重金屬元素。點解咁講呢？等太一叮同大家簡單解釋吓。

原來廣東四成入海排污口超標，其中珠江排污最多，搞到呢個海域嘅海產受到重金屬嘅嚴重污染。舉個例吖，好似港人鍾意食嘅蠔，唔講唔知，竟然含銅元素同鎘元素分別超標七百四十倍同埋九十倍，唔好話毒死人，嚇都嚇到半死啦。所以話，內地同胞真係唔知食乜先叫做安全，正一食又驚中毒，唔食又怕餓死。今時今日做中國人真係悲哀，國家領導人口口聲聲話要中國人活得幸福有尊嚴，呃鬼咩！

珠三角漁港污染咁鬼嚴重，咪就係因為奸商缺德，政府腐敗，利令智昏，國民道德大滑坡囉！大大細細嘅化工廠、企業一年三百六十五日不停咁排污水，未經妥善處理直接排入大海，海洋生物點會有運行吖。先係人類污染海洋生物，然後啲海洋生物畀人食落肚，慢性中毒，直至生癌瓜柴，咁就叫自作孽、不可活嘞。係咁搞落去，子孫後代唔好話冇魚食，遲吓連飲啖水都成問題，咁就真係斷子絕孫、亡國滅種嘞 ！叮！

唔使專家教路，受到污染嘅海鮮梗係少食為妙。問題係，政府經常裝聾扮啞，甚至刻意隱瞞，小市民點知邊樣有毒、邊樣無毒呢？再講啦，神州大地冇一種食品係安全嘅，避無可避，防不勝防，就算明知有毒，都係要食落肚喇。

城門失火，殃及池魚。香港大部分食物都係來自內地，內地海產出問題，香港一定受牽連。但奇怪嘅就係，廣東嗰邊就驗出問題，而香港呢度竟然水盡鵝飛，一啲動靜都冇，好似一舊飯咁毫無反應。呢種情況其實已經屢見不鮮，過去幾年，乜嘢三聚氰氨毒奶粉、孔雀石綠魚、毒蔬菜、塑化劑、蘇丹紅鴨蛋等等，都係人哋先揭發，港府先至賊過興兵。尤其係主管食品安全嘅周一嶽，次次渾渾噩噩，餐餐如夢初醒。

喂！點解周一嶽經常把關失職嘅呢？其中一個好大嘅可能性，就係食多咗污染海鮮，結果搞到體內重金屬爆晒燈，變傻咗。你知啦，重金屬最影響人嘅大腦中樞，造成神經病變，直至演化為肺硬化、皮膚癌等等，為咗七百萬港人嘅健康，唔該周局長快啲去睇醫生啦。