政壇：林公公巡西九做騷廢噏
西九管理局喺九龍公園設壇，展覽經修訂嘅西九發展圖則，尋日首日履新做政務司司長嘅「林公公」林瑞麟，等到個展覽喺傍晚六點結束後，六點十分佢至到場參觀，仲拉埋西九行政總裁連納智陪佢落去，佢一邊睇、一邊指手畫腳，裝作一款好熟西九嘅模樣，擺明喺度做騷。
睇咗一輪之後，林公公就撻着佢部「人肉錄音機」講恭維說話，一問起有關本地樂隊受歧視一事，佢就原形畢露，播帶話會繼續關心、繼續留意，情況同佢處理替補機制時候一模一樣，真係聽到人毛骨悚然。
記者再追問件事，佢就變本加厲話，發展西九嘅目的係希望本地藝術人才同埋國際藝術人士，可以「共同為我哋建構香港作為亞洲國際都會一個新品牌」。呢種咁嘅chok bite回應，怕且官場中佢認第二，都冇人敢認第一。