政壇：阿Ron棠哥新政總鬥鬼祟

添馬艦新政府總部美其名叫做「門常開」，但我哋不厭其煩講多次，嗰度應該叫做「門常關」先至名副其實。行政會議尋日喺新特首辦舉行預備會議，唔少非官守成員都有出席，點知散會之後，班記者苦等咗好耐都唔見有人出嚟，好似人間蒸發咁，後來先知道佢哋已經由側門走咗。

以前喺中環舊政府總部中座開行會嘅時候，班非官守成員都唔係事必經正門出入，但側門位處正門對面，傳媒只要一眼關七，總算可𥄫到佢哋行邊個門口，加上唔少非官守成員嘅座駕都泊咗喺中座出面，所以實情大部分人都會由正門離開上車，傳媒就可以把握佢哋上車途中嗰珍貴嘅三十秒採訪佢哋。

正門入側門出玩殘傳媒

好喇，依家換咗新場地就變成新作風，新特首辦嘅側門同正門離天百丈遠，根本冇可能同一時間𥄫實兩個門口，而且兩個門口中間有保安員築成嘅人牆，記者唔能夠喺側門外面等。再者依家啲非官守成員開完會之後，直頭可以先落地底停車場上車，然後安坐座駕中，循新政府總部西座嘅出入口絕塵而去，全程避過傳媒嘅法眼之餘，傳媒喺門外等都只會食塵，完全冇機會問佢哋嘢，例如行會新召集人夏佳理（Ron）同行會成員鄭耀棠，尋日就係喺正門入、側門出。論透明度，簡直新不如舊。

呢個問題，傳媒老早就同政府反映過，但係結果有用咩？好似建仔立法會議員李慧琼前日遊行去新政總請願，去完之後都呻，遊行沿途警察嘅指示不清，去到新政總之後先知道示威區太細，淨係企到百多人，政府真係好應該檢討下。老實講，相信佢鬧完都係無補於事，因為夕陽政府已經借咗聾耳陳隻耳，乜都唔會聽到。