東方太陽齊報捷 蘋果陰乾自作孽

善有善報，惡有惡報，太一叮始終相信，人在做，天在看，上天賞善罰惡，係好公平嘅。

呢，淫賤黎以為搞張宣淫販賤嘅免費報《爽報》就可以自慰自爽，渾水摸魚，點知結果係自己打自己，唔止累到同一集團嘅爛果報銷量跌到趴街，連廣告量亦買少見少。相反，堅持正義嘅東方報業集團就全線報捷，銷量及廣告齊齊上升，風景這邊獨好！

日前，太一叮曾為大家計過一條數，今日不妨計多一次。嗱，自從鹹濕《爽報》獻世之後，爛果報銷量應聲急跌，自稱印數少咗一萬幾，扣埋廢紙及賣剩回紙，報販估計爛果報實銷數量最少唔見咗三成，即係每日跌紙大約六、七萬份。反觀《東方日報》及《太陽報》就雙雙升紙，兩報合計每日銷量多咗六、七萬份，事實再次證明，讀者眼睛係雪亮嘅，選擇係明智嘅。

最好笑嘅係，爛果報屋漏兼逢連夜雨，除咗跌紙，連廣告都跌埋，唔止輸畀《東方日報》幾條街，亦輸埋畀《太陽報》添。唔怕唔識貨，最怕貨比貨，以九月十二至十六日計，當時《爽報》仲未出現，《東方》呢五日出紙張數總共比爛果報多二十張半，商業廣告多三百一十二條；但到咗《爽報》獻世之後嘅九月十九至二十三日，《東方》出紙張數已經比爛果報多二十七張半，廣告條數多七百八十六條半。淨係計多咗嘅四百七十幾條廣告，就足足超過二十六個版，唔到你唔服。

至於《太陽報》嘅表現就更加令人刮目相看，廣告量簡直好像火箭咁直線上升。呢，《爽報》未出之前，爛果報出紙張數及廣告都稍為多過《太陽報》，但《爽報》一出，形勢即刻逆轉，以九月十九至二十三日計，《太陽報》出紙張數反超爛果報，廣告更加多對方四十四條半添。喺呢五日期間，《太陽報》嘅商業廣告增加一百七十一條，即係多咗接近十個版，真係可喜可賀！

正如廣告商話齋，《東方日報》及《太陽報》反應快，除咗減價回饋讀者，而且改版應戰，內容充實咗，銷量增加咗，廣告商自然識得選擇，估計兩報近日廣告量增長超過一成。嗱嗱嗱，呢啲咪叫做得道多助，失道寡助咯，事實證明免費報根本搶唔到《東方日報》及《太陽報》嘅讀者及廣告，只係蠶食咗爛果報，淫賤黎害人不成反害己，銷量廣告齊齊急跌，今次仲唔係捉蟲，叮！

潮流興唱紅，有麝自然香，太一叮認為，最啱唱嘅歌始終都係：東方紅，太陽升！