政壇:友邦謝佩蘭睇牛扒知味
近排股市接連下挫,唔少人覺得係熊市當道,但友邦退休金管理及信託就牛氣沖天,因為佢哋有個「牛魔王」─高級副總裁暨執行董事Bonnie謝佩蘭。尋日佢喺一個飯局中仲提到好鍾意食牛扒,屋企雪櫃長期備有牛扒外,亦對食牛好有心得,淨係望吓隔籬位切嗰件牛扒,已經判斷到件牛扒嘅質素。
Bonnie身形苗條,但原來佢好鍾意食嘢,閒時走遍大街小巷搜羅美食之餘,仲會親自下廚,除烹調牛扒外,煎三文魚都係佢強項。問起近期有乜新搞作,佢話啱啱至新增咗五隻新基金,嚟緊會繼續研究客戶需要,唔排除會增加新基金計劃喎。