政壇：樂裕民高沽低增持利豐
利豐同好多大藍籌一樣，股價跌到阿媽都唔認得，唔怪得佢哋嘅大股東同管理層輪流增持股份，繼副主席馮國綸後，行政總裁樂裕民喺上個禮拜尾用咗近四千萬元增持共三百萬股，傳聞佢下個月同華人歌后李玟嘅婚禮會使成億元，比起呢個數係小數目啫！
仲記得今年一月，樂裕民喺利豐公布業績前，以每股46.4元至46.87元（當時未1拆2）嘅價錢，沽售所持有嘅部分利豐股份，持股量由1.53%顯著下降至1.1%。同今次增持個價比較，差咗成倍價錢，準新郎眼光真係準。
佢下月迎娶李玟，據聞佢哋想低調啲，但有好多傳聞，包括婚禮耗資逾億元、佢哋唔畀賓客影相、李玟壓力好大等。不過最近李玟係一個歌唱比賽嘅評判之一，見佢容光煥發，睇嚟壓力應該冇傳聞咁大。
