政壇：搞搞政：愛心辣媽落區鬥牛

每個人嘅閱歷都唔同，好似年僅二十四歲嘅菁英會成員Jenny李進秋，已嘗過極苦痛滋味，年前丈夫因癌病去世，留低佢同歲半囡囡，人生跌入谷底，惟丈夫愛助人嘅身影一直揮之不去。後來佢諗通咗，擦乾淚水，周圍做義工，延續丈夫嘅愛，嚟緊佢又遇上人生中另一挑戰，就係參選東區區議會樂康選區，挑戰社民連老將「阿牛」曾健成。

嚟自貴州嘅Jenny係辣妹一名，自細愛食辣，韓國料理辣而不膩，最啱佢胃口。食得辣，個性亦特別強，佢除咗創立廣告公司做老闆外，亦積極扶貧，多次參與內地建校同汶川大地震賑災等工作，又加入菁英會，同志同道合嘅青年才俊齊做義工。佢喺○九年創立非牟利機構「維社」，不時探訪青少年同老人。

走入社區，佢遇到老來不離不棄嘅恩愛夫妻，又碰見債主臨門嘅悲慘媽媽，每段故事都觸動心靈，佢正計劃將所見嘅真人真事輯錄成書，為港人打氣。