政壇：鄉紳寸爆牌匾贈煲呔曾
夕陽政府最近同新界鄉紳對着幹，先係申訴專員早喺年初挑起新界僭建風暴，辣慶鄉民包圍立法會，最近政府又決定將五十四幅毗連郊野公園嘅土地納入分區規劃大綱圖，搞到班僑領好氣憤咁話用槍炮對付政府，但政府一於少理。我哋收到消息，有鄉紳忍無可忍，打算喺聽日鄉議局就職典禮上「玩鋪勁」，直接向出席嘅主禮嘉賓煲呔曾贈興，送出帶有諷刺意味嘅「永遠懷念你」牌匾，表面上好似向明年執包袱嘅煲呔曾表示懷念，但其實寸爆佢冇關顧原居民，好閒夾唔送。
據聞，有鄉紳打算聽日向發展局局長林鄭月娥斟茶，多謝林鄭過去大半年對新界人嘅「關愛」，明眼人一睇就知係講反話想落林鄭面。可能林鄭一早收到風，尋日政府就出新聞稿話林鄭會喺二十九號至下月二號去意大利出席城市規劃會議，意味佢未必可能出席到鄉議局就職典禮。