政壇：CY獲中港家庭撐做特首
行政會議尋日開會，中港家庭權益會連同三十個內地孕婦到場外示威，一見疑似候選人行政會議召集人CY梁振英到場，即高叫「候任特首、主持公道」。CY面帶笑容咁接收請願信，表現得相當受落，但就冇任何回應。
相反，示威人士見到另一疑似候選人政務司司長唐唐時，就叫「特首爭櫈仔、中港家庭冇床位」，寸爆唐唐掛住選特首唔做嘢。點解口號都要分兩套？梗係啦，CY之前喺網誌度話，政府應該要優先照顧丈夫係香港人嘅內地孕婦嘅需要，難怪啲中港家庭咁支持佢，仲叫定佢做特首啦！
CY離開行會前話，依家手頭上嘅工作進度良好，應該會喺幾日內正式辭退行會召集人職務，至於「幾日內」即係幾時？CY都係答嗰句：「具體日子需視乎工作進度而定。」
中港家庭孕婦高呼CY做「候任特首」，當事人面帶笑容咁收信。