政壇：肥胡全民膠樽掟張建宗

新交津計劃最近開始派表，最初話有幾十萬基層打工仔可以受惠，點知因有最低工資加咗薪，搞到好多人唔合資格申請，申請人仲要入息審查，填表煩到好似查三代咁，篩吓篩吓，受惠人數銳減，勞工及福利局局長張建宗明知問題所在，但就一味死拖話遲啲會檢討。被視為政府智囊嘅智經研究中心尋日就拋咗個「全民交津（膠樽）」建議出嚟，直頭就係摑咗張建宗一巴。

智經研究中心主席「肥胡」胡定旭尋日話，之前做過問卷調查，七成幾受訪者覺得長途車費好貴，而呢班人每月平均交通開支成七百四十蚊。佢又提到住新界嘅人去港島返工，一個月閒閒哋要成千蚊車錢，都幾肉赤，佢喺屯門醫院就有好多同事住港島，更加感受到車費高昂嘅慘況，所以建議搞個長途乘客交通費用支援計劃。

雙重資助冇問題

呢個計劃聽落其實係變相「全民交津」，仲唔使入息審查，市民只要喺指定時限入面，用八達通搭夠十四蚊或以上，一個月坐夠七百蚊，八達通就唔會扣除之後嘅車費，由政府直接畀錢，以每人每月唔多過三百蚊為限。即係你一個月用九百蚊搭車返工放工，政府就會幫你畀兩百蚊。

智經特別顧問梁永立就話，資助唔包搭的士同坐東鐵頭等，費事畀人濫用，每年大概使十一至十三億元公帑。佢仲話，雖然有啲人攞完交津可以再申請呢個資助，好似雙重資助，但佢話綜援戶亦可以免費睇醫生，社會上一直存在雙重資助，只要係幫到有需要嘅人，唔覺得有問題。

呢個計劃如果真係成事，好明顯可以令好多依家申請唔到交津嘅偏遠地區居民受惠，一個月慳番二、三百蚊，都好過申請交津要填幾頁紙，仲要限制多多。