短打長擊：港警騰雞要向內地偷師

香港警察有多英勇，有時都好令市民糊塗。早前有個交警被法官姪女狠摑一巴就瞓低，未知是否成日食豆腐，搞到咁鬼脆弱？早排又有一單交警抄牌遇婦激動以利剪相向，交警一度拔槍制止，其後又話手部受傷送院。香港啲差人身體唔多好，未知是否與平時缺少操練或者掃黃放蛇歎太多免費飛機餐有關？

除了身體差，近排差人仲特別騰雞。最近，海關載有大批毒品的證物車翻側，警方荷槍實彈如臨大敵，又封路又披避彈衣，配備鋼盔及持長槍包圍車輛，在場一名警長更兇記者：「呢單嘢好嚴重，唔好行咁埋，真係會射你！」如今做記者都幾慘，影張相都畀騰雞警察當恐怖分子。阿哥，你估喺哥倫比亞掃毒咩？郁啲就話射人。

近排香港差人負面新聞特別多，男子漢形象日漸模糊，佢哋真係要好好向內地警察「學習」。

例一：張可可從外地趕到北京見女網友，遭拒後，情緒失控劫持五歲女童，被擊斃；辦案警察這樣說：「起着一個瓊瑤式的名字，幹的是本．拉登的事。」例二：浙江溫州市發生一起惡性破壞事件，二十多人手持砍刀、鋼管衝進一度假賓館逢人就打，見物就砸，致傷十八人；事發時，一位當地民警在現場，但沒有挺身制止，事後解釋稱「一個民警能力有限，冷靜觀察，收集證據是最好的處置方法」。

由此可見，內地警察即使殺人也有「比較文化」，袖手旁觀都冷靜得如聖哲，你說港警是不是要向內地偷師，以洗體弱、騰雞污名？