CULTURE噏：改詞net人

近年網上各大討論區湧現一批「改詞人」，以啜核抵死的用字，為流行曲譜上新詞，諷刺政府無能及對社會問題抒發意見，廣受網友歡迎。社會學家鍾劍華指出，政府雖已開設渠道接受意見，但很多青少年都認為此類渠道「無用」，政府不理會，惟有透過譜上新詞，在網上發聲，藉此惹起社會關注及網民共鳴。

「窮飛龍」：改詞組合，曾將多首流行曲譜上諷刺時弊的歌詞，當中以「賜座男」事件為題材的《直到你刮到我》，短短數日內錄得一百萬點擊率，是第一首有如此佳績的本地「惡搞」作品。

Oliver：我哋開始改詞，係因為覺得依家大部分嘅歌，都係講情情愛愛，好少同社會有關，所以就將流行曲譜上新詞，內容好多都係針對民生時事，或者社會熱話，而呢啲內容，好多都係我哋生活上嘅真實感受。

洋：好似我哋第一首改嘅歌《窮飛龍》咁，就係講依家香港樓價高企，青少年根本好難買到樓，好多大學生一畢業，都係得雞碎咁多人工，但係依家衣食住行樣樣都咁貴，樓價又咁高，仲點儲錢買樓？我自己就係一個活生生例子嘞！

琪：例如一首寫菲律賓人質事件嘅改編歌《半途擱淺》，描繪當時人質被挾持嘅情況，諷刺菲律賓政府無能，令我諗番當時嗰個震撼人心嘅電視畫面，非常觸動我嘅心靈，令我好感動！

鐘：我聽過幾首由「窮飛龍」改詞嘅作品，覺得佢哋嘅詞，除咗用嬉笑怒罵方式諷刺時弊外，亦帶出佢哋對社會問題嘅睇法，令人好有共鳴。其實喺好耐之前，已經有人透過改歌詞發表意見，但當時技術有限，好難錄製出嚟同對外發表，所以難以普及。直至近年，科技進步同互聯網普及，令到好多人以此平台發聲。雖然政府會立例規管，但如果無涉及利益，都應該給予豁免，避免扼殺創作。

Sylvia：作為年輕人，我哋都係社會一分子，都有好多諗法想同政府反映，但無論我哋正式向政府部門反映，定係上街遊行，我哋都唔覺得意見被正視，所以至會透過改歌詞等方式，表達意見。

Oliver：而且喺網上世界表達意見，可以引起更多人關注，規限又極少，無論隔咗幾多日、去到邊度，其他人都可以睇到我哋嘅作品，知道我哋對某個問題嘅意見。

洋：網友仲可以即時就我哋嘅歌詞回應，互相交流意見，互動性大好多。

鐘：雖然依家政府提供畀市民，特別係青少年發表意見嘅渠道比以前多咗，好似設立咗facebook專頁，但呢啲新嘅渠道，好多只係得個樣，根本冇實際作用，青少年惟有搵啲更加有效嘅渠道發聲。呢啲聲音，當權者絕對唔可以忽視。

歌詞節錄

歌名：

《窮飛龍》

原曲：《陀飛輪》

求學歷求高職，待遇高薪，爭取過，也沒有

我的兩餐一宿不足，怎麼配佳偶

地價太高，呎價已逾萬，而蝸居怎去購

賺到外快，物價仲快，無力買，論甚麼講究

歌名:《半途擱淺》

原曲：《擱淺》

原是開心最快樂路途

下秒鐘分開去上路

在這半秒差毫

卻擱淺半途走得太早

遺憾這哀痛片段路途

就此犧牲宿命擺布

誰預計料到

突然浩劫遇到

沒妥善行動布陣

沒友善談判怎和應

分秒時間浪費的陣營

沒有力難耐角力

善惡 被盲目地修飾

任由擺布 再驚慌亦要暫停