政情：羅淑佩歎奶茶有一套
港式奶茶不但係香港標誌，仲成為一種膾炙人口嘅飲品，尋日國際金茶王大賽2011港式奶茶國際總決賽，評審之一係旅遊事務署署理旅遊事務專員羅淑佩，佢話自己揀選嘅標準係「快、靚、好」，「快」就係師傅沖茶要快手快腳，「靚」就係沖出嚟嘅奶茶顏色要係金黃色，而「好」就梗係好味道啦。
大會為咗體貼一班評審，特登為佢哋準備咗菠蘿包同埋蛋撻，等佢哋可以一啖奶茶一啖菠蘿包。羅淑佩話因為自己專心歎茶，蛋撻都淨係咬咗一啖，冇時間慢慢品嘗。佢仲盛讚今年參賽者水準非常高，更讚香港代表、少年金茶王陳錦匯表現出色，話估唔到佢年紀輕輕，就可以沖得一手好奶茶喎。
羅專員又話，朝早如果唔使返工，或者有時間嘅話，佢通常會去茶餐廳嗌番個餐蛋治烘底，加杯奶茶就更完美。
羅淑佩平時都鍾意歎番杯香滑奶茶。
羅淑佩同埋評審逐一品嘗參賽者炮製嘅奶茶，決定冠軍誰屬。