政情：搞搞政：葛珮帆變身鯊魚龍友
愛好攝影嘅人都鍾意四出獵奇，沙田區議員葛珮帆近年鍾情潛水，亦熱愛攝影，尋日佢喺馬鞍山舉辦咗一場海底攝影展，大騷過去兩年，佢喺南極同巴哈馬群島海底影落嘅鯊魚相，話佢係鯊魚龍友都不為過。
佢尋日展出嘅十多張作品，幅幅都達到專業水平，不過佢謙稱其他攝影師嘅作品先至係專業，包括佢老公Henry嘅作品啦，尋日Henry就充當太太嘅攝影師，幫滿場飛嘅太太影相留念。展出咁多鯊魚靚相，葛珮帆話係想大家欣賞之餘，亦少食魚翅，拯救呢種瀕危動物。
問到葛珮帆有冇新計劃﹖佢話計劃出年三月至四月再度下海，呢次嘅目的地係菲律賓，而目標就係鯊魚中嘅巨無霸—鯨鯊，到時會帶埋一班中學生同行，希望將護鯊訊息傳遞畀年輕人。
設計圖片