政情：舖王四媳又有喜致失調

「舖王」鄧成波嘅四仔、東華三院總理鄧耀邦（Jason）同太太Joni前日雙雙危坐屋企窗台，引起一場虛驚。當事人Jason尋日同我哋講，太太生完BB冇耐，近日再度懷孕，懷疑因為咁搞到賀爾蒙失調影響情緒，所以先至會咁激動，澄清唔係產後抑鬱。至於Jason嘅爸爸波叔，據講前日知道事件後並無過分緊張，仲同朋友打麻雀添。

Jason話，太太平時性格溫馴，經過前日一事後，佢內心已經好過意唔去，但心情已經平復，Jason會盡量抽時間照顧太太，遲啲仲會搵機會去旅行放鬆吓。對於有傳話Joni唔鍾意Jason繼續讀中醫以致發生爭執，Jason就話自己已經完成中醫課程，嚟緊會專注東華三院嘅總理工作，同埋跟爸爸學做生意。

我哋尋日亦搵到Jason嘅細佬鄧耀昇（Stan），Stan暫時未去探阿哥兩公婆，但佢話聽媽咪講，兄嫂已經冇事，Stan仲話，平時見阿哥對阿嫂都好好，兩夫婦好恩愛，阿嫂生完BB後亦冇工作，希望阿嫂好好休息咁話。