政情：開餐笑笑口 陳家偉走出訪談陰霾？

早排爆出香檳大廈「訪談」事件、並辭去民主黨總幹事職位嘅陳家偉，消失一排之後最近已經返咗香港，前晚仲約埋三、五知己，去到新蒲崗一間酒樓食晚飯。陳家偉全程笑笑口，睇落完全冇受「訪談」醜聞影響。同枱除咗陳家偉之外，仲有一位相信係前民主黨區議員嘅男士，兩個仲傾得好開心添。

前晚七點半左右，陳家偉同兩男一女一行四人，齊齊去到新蒲崗一間酒家開餐。現場冇乜人認得佢，所以佢表現得相當輕鬆自在，滔滔不絕咁同朋友傾偈，仲不時發出笑聲，好似已經走出「訪談」醜聞嘅陰霾。陳家偉一枱人邊食邊傾，足足食咗兩個幾鐘都未埋單，認真好中氣。

同枱除咗陳家偉外，仲見到一個懷疑係前民主黨區議員劉定邦嘅男士。劉定邦曾經因區議會津貼問題畀廉政公署檢控，後來獲法庭判無罪釋放，不過喺○七年區議會選舉就輸畀一位獨立議員。如果呢位男士真係劉定邦，兩位曾經滄海嘅人一定有好多嘢分享，唔怪得食咗咁耐啦！