政情：廢噏撐港交所鬍鬚曾又甩鬚

環球股市連日急挫，揸貨嘅小股民驚坐貨，玩即日鮮嘅投資者更加坐立不安，點知股災都未夠，本港交易所禮拜三竟因為網站畀黑客入侵，搞到包括幾隻大藍籌在內嘅股票被停牌，搞到好多小股民無辜蝕錢。事件中，財經官員嘅表現好失禮，財政司司長鬍鬚曾一邊話其他地區交易所都有畀黑客入侵，同時又話港交所系統已好完善嚟粉飾太平，結果連港交所自己都承認要提升保安系統。鬍鬚曾又一次畀人剃鬚，遲啲仲可能要接受立法會議員公審添。

回應黑客入侵以為小兒科

政府高官成日誇口香港要做國際金融中心，但一個「披露易」網站受滋擾，已經搞到七隻股份連同四百多隻相關衍生工具要停牌，呢個中心都可算好脆弱，香港資訊科技商會會長方保僑就形容，呢次事件可以話係股票界嘅「911事件」，更質疑港交所至今仲未清楚交易所黑客「究竟裏面有冇改過嘢」、「如果改咗嘢……人哋睇咗、做咗錯誤嘅決定，又有啲咩後果？」

白鴿黨嘅涂謹申就話，事件嚴重影響國際投資者對本港嘅信心，而涂不滿嘅焦點就係鬍鬚曾喺事件中嘅回應好輕率，事件發生未幾便武斷咁話香港嘅系統好完善，又話其他交易所都試過畀黑客入侵，又係嘅，鬍鬚曾咁講法，好似以為件事係小兒科咁。

身兼立法會保安事務委員會主席嘅阿涂，已致函財經事務委員會主席陳鑑林，商討喺暑假休會期間開特別會議，港交所被襲一事攸關網上保安，又涉及財金系統，如果兩個委員會同意，暑假就會加插一個聯席特別會議，到時畀人公審嗰個一定有鬍鬚曾份！