港鐵管理超廢 列車一跪再跪

唔知頭唔知路嘅，仲以為本港鐵路係由近排畀人鬧爆嘅國家鐵道部管理，唔係嘅話，點解幾乎日日出事不特止，應急處理仲亂晒大龍？乘客谷到爆，港鐵不思改進，鑊鑊新鮮鑊鑊甘。

呢，又出事嘞。港鐵港島線尋日朝早繁忙時間因為電力故障，有列車甚至冒煙，服務受阻二十分鐘，多班列車停駛，連鎖反應之下，受阻乘客數以萬計。估唔到，一波未平一波起，東鐵大圍站中午亦有列車冒煙，服務受阻。一日兩次故障，簡直離晒大譜！

叮！繁忙時間個個爭分奪秒，列車失驚無神又跪低，真係多得港鐵唔少。其實，類似事故近排已經發生過N次嘅喇，淨係一條東涌線，半個月內就有四單，訊號故障、車輪軸承移位、列車冒煙等等，無奇不有。溫州高鐵慘劇歷歷在目，乘客諗都諗唔到，原來港鐵管理一樣信唔過，問你驚未！

提到港鐵管理，真係不提猶自可，一提把鬼火。前幾日有人喺沙田站墮軌身亡，列車服務受阻，但港鐵應變安排七國咁亂，接駁巴士遲遲唔見影，酷熱天氣下，幾百名乘客喺車站外面大排長龍，搞到怨聲載道。

行車安全冇保障，事故應變一鑊泡，更可怕嘅係，面對危機四伏，港鐵居然次次都係輕描淡寫，甚至怪罪輿論大驚小怪添。本報早前踢爆，西鐵兆康站上面及輕鐵站隔籬嘅屯門河畔公園內，有十支避雷針嘅導電銅帶被偷走，萬一雷電擊中隨時上演溫州慘劇翻版。面對安全隱患，港鐵依然無動於衷，而負責公園管理嘅康文署就將責任推晒畀外判承辦商。

講開外判，可能正係所有問題嘅根源，如果港鐵唔打醒精神，連監管責任都外判埋，遲早好似年前嘅電梯業咁，因為當局放任自流，變咗無王管，連唔合規格嘅零件亦照用可也，卒之多次發生「九天驚魂」墮(車立)事故。

港鐵啱啱用七百二十萬年薪請咗個洋人做行政總裁，咁大手筆，會唔會令港鐵脫胎換骨呢？計太一叮話齋，洋和尚都要服水土o架，港府作為港鐵最大股東，自己都超廢，洋和尚人生地不熟，睇怕都幾難唸好呢壇經咯。叮！