教育局政治助理楊哲安嘅太太係前藝人張燊悅，佢前晚出席一個秋冬系列時裝騷時，講到買衫之道，佢透露屋企人中最捨得幫老公添置新衫：「佢撐起頭家，唔想佢着得太寒酸。」至於女兒，佢反而買衫少啲，因為小朋友好快大。
喺屋企相夫教女嘅張燊悅最近有單喜事，因為佢秘密讀緊一個環境管理碩士課程，依家讀咗一年，初初入學時，佢啱啱佗住第二胎，擔心升唔到班，都唔敢公開，現在成功完成大學一年級，先至鬆一口氣。
張燊悅出席時裝騷，講到老公楊哲安就一臉甜蜜。
