搞搞政：黃國健獲贈空運發霉包

港區人大代表上月組團去咗黑龍江省考察，仲獲當地政府贈送一啲紀念品，不過，呢啲禮品真係物重情意更重，因為每人獲贈一盒四包裝嘅大米，有成十公斤重，另加一個面積大過人頭嘅當地特產麵包嘅俄式麵包「列巴」。成員之一嘅工聯會立法會議員黃國健當時冇攞禮物，點知返香港後「驚喜」無限，發現佢嘅禮品已經空運到港，不過，列巴發咗霉啫。

黃國健話，佢因為報咗名跟立法會去南韓了解標準工時，所以提早離團，冇帶走啲米同個包，事後先知隨團工作人員好好心，幫佢寄咗返香港。日前佢返港之後，見到禮品先知，問到個列巴咩味？黃國健話唔知，因為發咗霉。

港區政協委員下個星期亦會組團訪問新疆，雖然最近嗰邊又有恐襲，但係個團照舊成行。之前報咗名嘅政協陳鑑林臨時退團，但佢否認係因為擔心遇到恐襲，而係因為要跟所屬政黨到廣東考察，分唔到身先決定縮沙喎。