政情：楊釗弟1.8億買澳洲豪宅
澳洲豪宅有價。日前有報道話香港有個楊氏家族以天價二千一百五十萬澳元（約一億八千萬港元）喺澳洲悉尼買咗間豪宅，經我哋打聽下，先知道呢間豪宅原來係有「牛仔褲大王」之稱嘅旭日集團董事長楊釗家族買落嘅。
楊釗尋日出席北京嘅對外經濟貿易大學喺香港舉行建校六十周年慶祝活動，問到呢單大刁，楊釗直認間豪宅係胞弟買嘅，仲話睇好嗰邊市道，而澳洲已經係佢哋牛仔服裝生意嘅第二大市場喇。
分散投資係楊釗嘅投資心得，佢哋依家最大嘅市場係中國，因為風險小、前景好喎，相反七、八年前已經開始減少美國嘅投資。唔通楊釗洞燭先機知道美國經濟會唔掂？佢就笑笑口話︰「當你付出一蚊，發現好難先搵番一蚊，就要諗計喇！」
楊釗承認胞弟喺澳洲用天價買豪宅。