政情：CY集體負責制新解

行政會議召集人梁振英（CY）為求參選特首，經常公開同政府政策唱反調，被指違反行會集體負責制同「政治抽水」。尋晚佢又連趕兩場活動，先同一批青年富貴黨成員去蘭桂坊飲嘢，然後再撲入屯門拜會當地鄉紳，並為自己經常唱反調「抽水」自辯。

尋晚有青年富貴黨成員質問CY，話假如佢真係爆大冷當選特首，佢旗下嘅行會成員不斷唱反調會點做。CY辯稱行會集體負責制，唔代表行會成員嘅公開發言必須同政府政策一致，同大家嘅理解好唔同。佢跟住大講未來特區政府嘅「八大關係」如一國兩制、中央特區關係等，聽完都唔知佢講乜。

繼市建局主席張震遠日前挺梁後，一直被視為梁營嘅會計界立法會議員陳茂波（Paul）尋日同傳媒飯局，直言CY「係一個好好嘅人選」，即使未獲中央祝福，都應該畀佢入閘。阿Paul又形容現時香港政局好悶，希望出現新變化，暗示唔撐喺政府多年嘅政務司司長唐英年，之後又指全國人大常委范徐麗泰嘅高民望，只係「積累落嚟嘅本錢」。講到咁明咁白，即使佢多番否認屬於梁營都冇人信喇！