政情：煲呔曾施政諮詢發噏風

被遺忘係最痛苦嘅，仲有唔夠一年就收工嘅煲呔曾最近深明此理，佢呢排以諮詢施政報告意見為名同多個團體會面，尋日就同建仔及工聯會兩大建制勢力人員會面，人哋好均真咁提咗樓市、減稅等措施出嚟，煲呔曾卻愛理不理，反而借佢哋過橋，搶住見記者發表一篇「今屆政策會延續下屆」嘅謬論，好似當下一手係佢嘅「G」咁，面皮厚到咁，又表演欲十足，真係冇佢收！

鄭耀棠冇癮快閃

煲呔曾同啲團體見面時，大都一早講明只聽唔講，日前仲開到聲限制與會者引述佢嘅言論，好似驚死人哋沾佢光咁，可惜佢太高估自己，結果早兩日嘅會面，佢好似透明咁。尋日佢又同建仔及工聯會見面，會上煲呔曾已經表現得冇心裝載，好似唔多聽得入耳咁。

見完工聯會之後，煲呔曾更罕有咁主動要求搶先工聯會一步，落政府總部大堂見記者。按照本地政圈嘅慣常做法，啲團體通常都會喺同政府官員會面後，向傳媒講吓佢哋嘅意見，既交差又做宣傳，點知尋日煲呔曾就騎劫咗呢個場合，將工聯會推到靠邊站，結果身兼行政會議成員嘅工聯會會長鄭耀棠疑似冇癮，借故走先。

至於煲呔曾，就趁機大講佢會喺施政報告構思短、中、長期措施，為下屆政府打好基礎，仲話只要政策到位及回應訴求，無論今屆及下一屆政府都會照做。煲呔曾呢番說話真係幾妙想天開，以為自己好有影響力、兼政策可以跨越任期，完全唔諗吓點解下一手要買佢帳？而且，應屆政府衰嘢一大把，唔留低燙手山芋或者炸彈已經好好喇，至於好嘅政策？真係唔知邊個有寄望。

其實煲呔曾漠視民意，民望破底，做唔做得完餘下十一個月任期都未知，好心佢活在當下喇。