政情：搞搞政：林鄭巡僭建熱情難卻
發展局早前已經公布咗新界村屋僭建問題嘅處理方法，部分依家被視為僭建嘅天台簷篷可以暫緩執法，但遲早都係要拆。
新界鄉議局尋日特意安排千幾名村代表同家屬去鄉議局新大樓劇院睇電影，仲喺大樓內搞大型盆菜宴，氣氛極為熱鬧。期間講開拆僭建物，副主席張學明話講得暫緩，應該至少都可以保留幾年嘅，但呢類簷篷其實有實際需要，佢仲打蛇隨棍上，話好似依家天氣咁熱，唔通真係時時刻刻開住冷氣咩，咁咪仲唔環保囉？
鄉議局之前試過邀請發展局局長林鄭月娥落村視察，但畀人請食檸檬拒絕咗，張學明話嚟緊會考慮再次邀請局長入村，確切了解鄉民實際生活情況係點，希望局長確切感受到鄉民嘅感受喎。
嘩！呢排係酷熱天氣，日照中天，村屋嘅天台肯定熱到飛起，等林鄭去嘗試吓對腳變鐵板燒係乜嘢滋味？呢招都算絕嘞！
設計圖片及對白