政情：林公公推銷替補狂插大輝

上周五出爐嘅替補機制諮詢文件臚列咗四個方案，但冇講清楚係咪四個方案都會符合《基本法》，泛民主派同建制派齊齊發炮，政制及內地事務局局長「林公公」林瑞麟當日已經發火，尋日佢接受電台訪問時仲撩交嗌。

話說佢講講下就話政壇議會中，有唔少議員都係善變，投票意向成日轉軚，令到政府拉票時有好大困難，又話：「佢哋今日話冇問題，過幾日又會話有好大問題。」不過，佢隨即又扮大方，話呢啲問題唔係香港獨有，當年同董建華到美國見克林頓，講到政府喺議會冇票時，對方都有同感話「I know it」！

林公公本來都冇指名道姓，但當主持人問到佢喺立法會畀議員窮追猛打有乜感覺時，佢就將槍口對準廠商會嘅林大輝，話大輝當日嘅言論唔係博士論文，根本係諗到乜就講乜，叫大家唔使仔細研究，暗寸大輝講嘢唔經大腦。佢之後再插大輝一刀，話冇一個人有資格代替政務司司長唐唐出聲，矛頭直指同唐唐關係密切嘅大輝。

大輝尋日話無論林公公係咪講緊自己，都唔會咁傻對號入座喎！