政情：選民力量舞台劇寸煲呔曾

以狙擊白鴿黨為重任嘅選民力量前晚搞搞新意思，喺柴灣青年廣場演出一套叫做《選民力量大戰9UP霸權》嘅舞台劇，一眾核心成員，好似人民力量主席劉嘉鴻、星屑醫生歐陽英傑、選民力量主席林雨陽同前港姐袁彌明等都戮力演出。

話說有一節，幾位演員排排坐，模仿電視遊戲節目嘅玩法，開出好多條問題畀現場觀眾選擇答案，好似問大家，煲呔曾喺○八年發表施政報告時多次將「冗長」讀錯成乜呀？煲呔曾喺邊年喺立法會講粗口「狗噏」等等，總之全晚不斷同觀眾互動，每次恥笑煲呔曾時笑聲更加此起彼落，可見佢係幾咁乞人憎。

選民力量前晚寸盡煲呔曾，全場幾百觀眾齊齊起哄。