政情：iBond出籠鬍鬚曾搶功瘀爆

究竟乜嘢叫做「政治抽水」呢？由財爺鬍鬚曾親身示範畀大家睇。相信大家仲記得，平日發表「每周一篇」網誌嘅鬍鬚曾，今年二月底發表完「史上最廢」嘅預算案之後，民怨四起，民望插水，即時停寫網誌兩星期，匿埋唔見人。點不知，預算案建議發行「通脹掛鈎債券」（iBond），啱啱認購程序完畢，佢竟然第一時間寫網誌，自我歌功頌德一番。

佢喺網誌話喺預算案早早提出，要啟動零售債券發行，較可取嘅方法係發行iBond，「iBond發行嘅成績，證明我哋呢個判斷係正確」。或許佢唔知立法會審議緊《版權修訂條例》，尊重「原創版權」係相當重要！

吹噓 提早搞掂超額認購

咁邊個係最先提出推iBond呢？答案係白鴿黨嘅涂謹申，唔係鬍鬚曾。但睇勻成篇文，「涂謹申」、「白鴿黨」三個字，隻字不提。政客抽水嘅金科玉律，係要引用出處，但鬍鬚曾話，iBond係「各同事努力和參與的成果」，擺明係搶功喇！

鬍鬚曾又話iBond係經過詳細研究同探討，原本計劃半年內推出，如今不夠五個月便推出唔多於一百億元嘅債券，結果認購額達一百三十億港元，自吹自擂係話「超額認購」，但係其實對債券市場嚟講，呢個所謂「超額」真係認真濕濕碎。

喺高通脹下，佢又講到自己好似「明燈」咁，話iBond嘅目的係畀市民多一個抗通脹嘅選擇，而投資iBond完全冇風險，總之係冇老點市民喇！

呢次就話判斷係啱嘅，咁以前咪錯晒？正如iBond唔使五個月就搞掂，但點解跪低派六千蚊，都係用嚟抗通脹嘅安排就搞到倒瀉籮蟹咁，市民等到頸都長到依家仲未開始登記，鬍鬚曾憑乜邀功呀？