短打長擊：笨人笨策 難救地球

香港之所以有今日的困局與民怨，皆因管治失當，用人失效。早在一百多年前，大學者嚴復就看出清末積弱的主因：由於外患者十之三，由於內治者十之七。

香港庸官當道，推乜都衰，尤其搞環保，一個「停車熄匙」，無視香港特殊環境，搞到唔湯唔水，怨聲載道；一個「膠袋稅」，又係劣評如潮，環境局局長邱騰華只會動作多多，添煩增亂。

業界調查發現，膠袋稅推出兩年，塑料袋業用於製造膠袋類產品的數量不跌反升，不織布袋產量勁升九成六，垃圾袋產量增加六成三，整體用膠量更升兩成七，揭示膠袋稅未能減少用膠量。

在反對聲中，政府仍然一意孤行，有意將膠袋徵費計劃擴大至全港六萬間零售點推行，而為減輕行政成本，日後又容許徵費毋須上繳，由商戶直接「落袋」。咁搞法，膠袋徵費計劃已失去原意，徒添商戶「收」或「不收」五毫子的疑慮。

世上嘅嘢，最緊要係平衡。市民減少用膠袋，就多用咗垃圾袋，為慳五毫子，就多用咗不織布袋；加上區議員派、學校派、買豬肉乾派、參加減肥班又派，筆者屋企大大話話有幾十個不織布袋！事有必至，理有固然，這就是邱局長諗出來的「好橋」！

政府唔肯走出思維嘅迷宮，施政一味「只看動作，沒有實效」，一味擴大徵費，倒不如廢法，做好推行垃圾分類，教育市民，完善配套及回收系統，如此更實際。

高官不知平衡之道，笨人笨策怎救地球？