政情：彭芷君Q版公仔謝陳仲尼
香港青年聯會姊妹團組成嘅「賢慧社」，七月一日跟隨青聯換屆，領導層亦有變動，前主席彭芷君（Gi Gi）「升呢」做榮譽主席，主席就由家族從事酒店及物業投資嘅羅詠詩（Anthea）接棒。保良局副主席梁寶珠千金林玉茵（Maya）、名媛鄭詩韻（Michelle）及青年創業家周沁齊三人就榮升做副主席。
卸任主席嘅Gi Gi為答謝好姊妹及前青聯主席陳仲尼（Rock）過去嘅支持，上周五就搞咗個上海菜飯局。當晚阿Rock置身二十幾位女士當中，令餐飯變成「美女伴月飯局」。Gi Gi讚阿Rock女性緣佳，即場送上一個阿Rock嘅Q版公仔，背景貼滿賢慧社嘅美女相，確係物輕情意重。
陳仲尼（中）支持「賢慧社」不遺餘力，彭芷君（左）同羅詠詩（右）送上Q版公仔致謝。