政情：搞搞政：陳健波調位避掟嘢三人組

立法會暑假後就會搬去添馬艦新大樓，議員都編配咗新座位，早排我哋講過，保險界議員陳健波嘅座位被編喺立法會掟嘢三人組前面。佢一度自言不堪壓力，仲話自己心血少，如果第日長毛忽然從後大嗌，佢心臟未必頂得順。日前，佢報喜已經解決難關，事關佢拿拿聲同醫學界議員梁家騮調咗位，避蕉避成咁，真係苦心噃。

立法會編配座位嘅結果早輪已經公布，無論係開大會、財會定內會，由人民力量黃毓民、陳偉業同社民連梁國雄組成嘅掟嘢三人組，都係坐正喺「五散人」後面。即係話，掟嘢三人組將來要掟蕉、掟飛機甚至掟道具，或者大力拍枱拍櫈喪鬧特區高官，「五散人」都難免感受到從後而來嘅威力，唔襟得嚇都好弊㗎。

咁點解陳健波會同梁家騮換位呢﹖會中人話，梁家騮成日唔開會，而且佢做醫生，唔知係咪襟嚇啲呢！又或者建制派應該再執位，將開會仲少過梁家騮嘅金融界李國寶同體育界霍震霆，安排坐喺黃毓民同陳偉業前面，咁咪大家都happy。