政情：70萬元拆僭建煲呔曾猛呻

煲呔曾間祖屋五月底被本報獨家踢爆僭建圍封露台後，佢一度死撐，後來死死氣認衰話會清拆，但拖咗一個半月都未見行動。我哋收到風，煲呔曾最近同人呻，話清拆祖屋僭建物費用要花兩個月人工，仲慘叫「好傷」，以煲呔曾月薪三十五萬元計算，今次清拆工程坐底都要七十萬元先可以埋單。究竟係煲呔曾僭建工程太浩大？定係佢要執嘅手尾太多呢？

有人話，七十萬元拆僭建聽落有啲貴，質疑煲呔曾係咪焗住被人當老襯咁㩒；又有人估計，搭棚都要十幾萬，加埋清拆後嘅內部裝修及清泥頭，計落都要幾十萬元。至於煲呔曾有冇報大數先周圍唱，就冇人知喇。睇番同樣被揭發有僭建物嘅問責高官都已迅速清拆僭建物，反而煲呔曾就闊佬懶理、拖到家吓，真係超級反面教材。