政情：申訴署逼拆街板 林鄭兩面難做人

年底就有區議會選舉，政府早前宣布要清拆道路兩旁嘅街板，仲話基於道路安全為由，建議取消全港二千八百多個喺馬路中央分隔欄嘅街板展示點。尋日立法會發展事務委員會討論呢個問題，發展局局長林鄭月娥就畀議員圍攻，指摘拆街板嘅建議有政治目的，林鄭月娥梗係唔認有政治目的，但就堅持拆街板對社會大眾有益，好似變身做「好拆得局長」。

議員轟食署執法不嚴

林鄭一向有好打得局長之名，點解變咗「好拆得」呢？原來同申訴專員公署都關係密切，家吓席捲全城嘅僭建風暴，開始嘅時候都係申訴專員公署批評地政總署、屋宇署處理新界違規僭建物不力，卒之搞到林鄭要喺全港推行大規模清拆僭建物嘅工作；而街板事件，最初亦係申訴專員公署批評政府縱容滿街街板，尤其係道路中央，搞到駕駛人士視線受阻，道路安全降低，林鄭想手軟都難！

不過，立法會議員就話之你，尤其今明兩年係選舉年，各黨派都唔想失去高曝光率嘅街板展示點。白鴿黨嘅甘乃威尋日就擔心，政府明就話管理街板，實際就會收窄政黨表達意見嘅機會同陣地。旅遊界嘅議員謝偉俊更加質疑申訴專員嘅批評，認為馬路中央分隔欄嘅街板可以導致交通意外嘅說法，指當局缺乏實質數據支持。亦有議員批評食環署執法不嚴，搞到部分街板鬆脫，並唔係街板展示有問題。

不過，議員最擔心嘅都係政府係基於政治目的，甚至打壓政黨活動，要求林鄭月娥喺推行拆街板行動前先進行仔細研究。林鄭強調政府並無政治目的，仲保證將來嘅街板展示點數目唔會減少，政府亦會一視同仁推行，講到尾就係所有政黨都必須將受影響街板拆走，一啲都唔肯讓步。