SUN世代:做散戶明燈最開心

接掌家族工程生意,做個「印印腳」太子爺,多麼逍遙快活。但投資達人吳子軒(Jasper)卻拒絕一世做太子爺,反而將興趣變成事業,銳意在金融界闖出一條新路,前年更夥拍朋友成立投資「學堂」,教授市民投資策略,從中更獲得無比滿足感:「我覺得事業要有突破,創業投資亦都一樣,最開心係幫到人!」

在○八年金融海嘯,捲走不少人的財富,投資變成墳墓。翌年,Jasper與幾名資深投資者創立投資策略研究中心(FCI),為散戶出謀獻策,「教育制度唔教理財之道,其實呢樣好緊要,好多人有咗錢,唔知點管錢。所以我哋希望將自己嘅投資經驗,教畀啲小股民。」該研究中心舉辦超過一百場免費投資講座,吸引不同階層、背景的散戶取經,兩年來更有逾二千人報讀課程。

生物系畢業撈過界

現年三十七歲的Jasper,為中心首席導師兼分析師,主攻股票和黃金市場。擁有十六年投資經驗的他,原來是半途出家。「我喺科大生物學系畢業,之後去咗澳洲深造財務及銀行碩士課程。畢業返嚟香港,做過唔同嘅行業,例如銷售員、市場推廣等,投資算係業餘興趣,但回報反而最多。」

○二年,他更首次成就自己的創業夢,與太太夫妻檔開設補習社,「諗住小朋友市場商機幾好,點知又唔係咁,兩年後結束咗生意,改喺外面嘅補習社掛單教書。」

所謂富貴險中求,馳騁商場,最重要敢於嘗試。雖然創業觸礁,但不減他投身商界的決心。○四年開始,他於父親與親戚開設的建築工程公司擔任行政工作,卻未打算做「太子爺」,打一世風流工,於是他將業餘投資工作搖身一變成全職,「三十歲之後,覺得一定要喺事業上突破自己,好想再試吓,試過先知會唔會成功。」結果他創立了FCI,並獲得更高的滿足感,「雖然收入唔高,但係好開心,因為可以幫到人學識投資,就算只係跑贏通脹都好!」

揀啱「老婆」咪放手

為了做好呢份工,Jasper全情投入,早上六時許,便開始留意全球股市,熟讀投資策略與計算方法,務求與學生一起「做足功課」。不過,他認為,投資最重要是謹記失敗經驗,不要被少少回報沖昏頭腦。他試過一日出三份糧,亦試過錯失良機,少賺一百多萬元。但教他最難忘的,是遇上九七金融風暴,「當時損失咗五成本金,從中我學到,揀嘢投資就好似揀老婆咁,覺得啱就唔好放手。」不少商界才俊的目標是及早退休歎世界,但他卻想永遠保持衝勁:「冇諗過退休,有嘢做先有意義,依家目標係投資至少有一倍嘅回報!」

Profile

現職:投資策略研究中心首席講師

學歷:香港科技大學生物學學士、澳洲悉尼大學商業碩士

婚姻狀況:已婚,育有一女

興趣:跑步、烹飪

公職:國際青年商會香港總會出版事務董事(2010)、北區青年商會財務長(2009)、第一屆環保「友」道企業大賞籌委會主席(2009)

獎項:國際青年商會亞太大會最佳環境發展獎、第一屆環保「友」道企業大賞籌委會

「Money18免費即秒股票報價網站」現推出8升級功能,財經資訊,實時實發!

張美蘭

Jasper(紅圈示)與投資課程的學員合照留念。(受訪者提供)

Jasper(左一)碩士畢業後,從事市場推廣工作,並與同事打成一片。(受訪者提供)

除工作以外, Jasper(前排中)亦參與公益活動,早前在青年商會年度晚宴上大展歌喉。(受訪者提供)