政情：搞搞政：鼠王芬有難 工聯會心涼

夕陽政府喺七一遊行後又再趴街，決定押後二讀遞補機制，除咗威信崩潰，亦令到一名建制派立法會議員一夜之間「聲名大噪」。

一直力撐替補機制嘅專業會議嘅法律博士「鼠王芬」梁美芬對外宣稱未有投票意向，點知到政府跪低宣布押後機制二讀當日，佢即晚廣發宣傳單張，反對政府唔做諮詢喎。單張隨即喺網上熱傳，網民對佢大加撻伐，批評佢乘機抽水，有網民仲好有創意將佢嘅頭像貼喺一隻真老鼠上面，寓意佢係「過街老鼠、人人喊打」，而喺呢個時候，連帶佢喺九龍西嘅直選議席都有啲危機。

工聯會內部消息話，鼠王芬自從上次選舉後一直多謝都冇句，仲夠膽死話自己冇受過工聯會恩惠，工聯會由上至領導層、下至會員義工對此都好唔滿意，難得今次鼠王芬人氣暴跌，仲唔乘機光復九龍西咩？加上工聯會總部設喺土瓜灣，發迹地亦係九龍西，支持度喺該區一向唔低，點會唔蠢蠢欲動先吖。

至於鼠王芬，尋日出席立法會會議期間一直唔肯出嚟回應傳媒報道同市民意見，記者曾透過多名議員希望叫到佢出嚟傾幾句，可惜佢一直唔肯出嚟。同屬專業會議嘅何鍾泰同劉秀成都不斷幫鼠王芬講好話，但咁有乜用吖，奉勸鼠王芬都係快啲出嚟交代好過啦！