政情：禮賓府泳池乾塘冇人理
喺七一有二十二萬人上街後，夕陽政府陷入管治危機，好似早幾日各主事高官同煲呔曾喺禮賓府商討點樣處理替補機制惡法，畀本報揭發禮賓府內一棵台灣相思因生蟲而被砍，點知除咗樹有病之外，原來泳池早就乾塘嘞！
立法會工業界議員林大輝喺自己通訊上面踢爆，話佢同「五散人」其他成員四月中獲邀去禮賓府作客時，畀佢發現禮賓府內嘅泳池竟然冇水，乾塘喎都咪話唔邪。
禮賓府係有專人打理，但接連出問題，唔通喺大宅嘅主人有問題？煲呔曾民望乾塘係不爭嘅事實，與其丟低個泳池唔用，倒不如開放咗佢，造福市民！