政情：發叔 林偉強 翻兜區議員?

雖然畀泛民主派追到瘦，但政府早前仍然話要喺區議會選舉前先公布點樣取消區議會委任制。而近日仲有消息傳出，已失去區議會當然議員資格嘅新界鄉議局主席劉皇發，同埋副主席林偉強極有機會再獲委任做區議員，如果屬實的話，下屆除咗翻兜做區議員外，仲大有機會翻兜再做所屬區議會嘅主席添！

發叔同林偉強原本分別以鄉委會主席身份，進身區議會成為當然議員，仲分別擔任屯門同離島區議會嘅主席添，之不過，年初佢哋雙雙喺鄉委會選舉失利，失去當然議員資格，連帶區議會主席個位都冇埋，最後黯然離開區議會。其實地區人士一直都傳緊，政府會再安排兩份免費政治午餐畀佢哋，等佢哋重返區議會，繼續為政府遮風擋雨。

有離島地區人士同我哋講，如果林偉強再次獲委任做離島區議員的話，咁就好有機會再次坐上主席寶座，因為離島區議會唔計民選議員，亦足足有八票鄉事票，如果加埋民選而又有鄉事背景的話，咁仲隨時唔止呢個數添，所以林偉強如果再獲委任，區議會主席位幾可肯定係囊中物。

政府做得差 要搵舊人護航

其實政府一早講過，唔會再委任番啲落選咗嘅民選議員，雖然發叔同林偉強都唔係民選議員，政府即使再委任都唔算反口覆舌，但真係好肉酸囉！咁樣委任法，唔只係免費政治午餐呀，仲係政府殘廢餐添呀！講到底，成件醜事嘅始作俑者就係政府本身，如果唔係夕陽政府做得咁差，又使乜搵番啲舊人為政府護航吖，簡直係不知所謂。

老實講，班泛民主派已經鬧爆政府唔肯一刀切取消委任制，若果政府真係委任發叔同林偉強做區議員嘅話，肯定鬧到拆天，可以預料發叔同林偉強到時有幾尷尬。