防疫輕率滋滋油 病態官僚無得救

市民小心，疫情惡化！太一叮講緊嘅，既係奪命猩紅熱疫潮，亦係港府防疫輕率麻痹嘅風土官場傳染病。今次猩紅熱疫潮暴露病態官僚已經病入膏肓，無得救o架嘞！

變種猩紅熱再殺一名五歲男童，其實疫情早喺上月底已經敲響警鐘，當時一名七歲女童證實染病身亡，其他感染個案亦急速冒升。換轉係有承擔同警覺性高嘅政府，早就如臨大敵啟動防疫措施，之但係大家都知負責把關嘅食衞局局長周一嶽，為官幾咁滋油淡定o架啦，完全唔見有對策出台。卒之咯喎，再有小童犧牲咗嘞，佢老哥先至一覺瞓醒急急補鑊，決定由尋日開始每日公布疫情發展。

最新公布數字顯示，過去一日再有廿八人感染猩紅熱，中招人數累積至四百九十四人。更得人驚嘅係，再有一間學校爆發疫潮。周一嶽無得再滋油淡定，話疫情高峰期將持續兩個月，呼籲家長留意子女健康喎。

呢個都可以話係「遲來的呼籲」咯！數數手指，至少遲咗五日。原來早喺上星期三，醫療高官已經同醫學會開會，討論猩紅熱個案大幅飆升。前衞生署署長李紹鴻喺會上建議，倣效當年沙士爆發嘅做法，每日公布最新感染數字，提高公眾嘅防範意識。但係好可惜，呢個良好建議被當局一口拒絕，直到再有染病男童不治，當局先至知驚轉軚宣布措施。

太一叮好想問問港府，點解明知疫情嚴重都無打算公告天下提醒大家？如果只係為咗免麻煩，咁算唔算靠害市民？如果係錯判疫情，咁係咪即係防疫輕率、後知後覺？病人組織講得啱o架，防疫資訊延誤發放，無形中減低社區嘅免疫力，若然有病童耽誤咗治療，失職官僚擔唔擔當得起？

之不過咁，話說回頭，港府對防控猩紅熱疫情失去應有警覺，太一叮絕對唔覺得出奇o架。呢，同樣係上月之嘛，黑心起雲劑搞到台灣天翻地覆，人人聞之色變，周一鑊都可以大言不慚咁話，市民食少少無事嘅，一度拒絕將塑化劑納入恒常監測範圍。可能當其時佢一樣覺得，猩紅熱係小兒科，好小事啫，終於延誤防疫時機。

仲有，本港以前面對禽流感、手足口病同豬流感襲擊，周一鑊把關一樣懶懶閒，以致大禍臨頭就束手無策，正如佢個花名，鑊鑊新鮮鑊鑊甘。太一叮真係好懷疑，真正有病嘅應該係周一嶽同佢班同僚，患咗一個防疫癡呆症，終日渾渾噩噩神志不清，而且病情仲係去到末期無得醫嗰隻。所以咯喎，太一叮奉勸大家，防疫唔好靠班官呀，都係自求多福啦，叮！