政情：楊崢識食打救塑化男
名模楊崢早前獲邀拍攝營養標籤廣告，叫大家要注意食物營養，向來識飲識食嘅佢本身亦係揀飲擇食一族，去超市買食物時，一定會留意食物成分同營養，專揀有營養嘅食物。佢話：「我都唔算誇張，媽咪仲叻過我，有時未到期嘅食物，即使聽日先到期，媽咪都寧願唔要，所以自細我都受佢感染。」
不過，佢都承認始終女士會較為注意飲食營養，亦見過唔少幕後工作人員，特別係男職員，對食物毫無要求，只求飽肚，佢認為依家好多食物或多或少都加入添加劑，所以佢都食咗好多添加劑落肚，但希望提醒身邊嘅人，添加塑化劑嘅食物都係少食為妙。佢又透露稍後將接拍一部單元劇，戲中飾演紀律部隊成員，已有五至六年冇拍劇嘅佢話好期待拍戲過戲癮。
楊崢原來係揀飲擇食有「營」人士。