政情：搞搞政：懶理棺材房 德成局長扮盲
班住喺半山豪宅嘅政府高官根本唔知民間疾苦，除咗對復建居屋議而未決外，最近更發現深水埗有「劏房」變做「棺材房」，每呎月租更高達三百元，被立法會議員形容為香港嘅恥辱同悲劇，質疑目前法例係咪過時。
不過，負責嘅民政事務局局長曾德成勁卸膊，話當局早前曾先後三次進行巡查，其中一次成功入去，但多數房間已上鎖，所以睇唔到啲床位數目，唔能夠證明有關處所要法例領牌經營喎。呢啲真係叫「眼唔見為乾淨」囉，有啲咁嘅高官，難怪呢個夕陽政府江河日下喇。
講開「棺材房」，專業會議嘅議員梁美芬就話，佢曾經因搬屋暫住酒店，當時住百零呎全海景房間都只係一萬元，質疑係咪有人無知畀人呃喎。其實以租金相比，佢講得冇錯嘅，但佢用酒店海景房同「棺材房」相比就確係有啲極端囉！
