政情：民協搶閘 區選前益街坊
由民協立法會議員KK馮檢基做主席嘅民協社會服務中心咁，上個月開始幫街坊搞團購計劃，仲搵埋善長捐錢為街坊爭取更多優惠，依家區議會選舉臨近，呢個「賣大包」舉動，難免惹人質疑。
我哋睇過民協社企啲團購單張，除寫上「仁愛扶貧團購計劃」外，仲寫上「特別鳴謝計劃捐款人：龐維新先生」。KK話贊助今次團購計劃係龐家基金，至於收咗幾多錢佢就唔肯講，只強調筆錢係無條件嘅，佢答應咗對方將來計劃完結，就會畀番份財務報告畀龐維新交代善款去向。
記得KK今屆區選險勝後，都鬧過建制派喺區內鋪天蓋地派嘢益街坊，早陣子亦提過富貴黨四出派嘢，點知呢條橋最後用番喺自己身上，呢啲咪係有口話人，冇口話自己囉！