政情：花旗周永贊狂操煲冬瓜

花旗銀行嘅Simon周永贊下星期一會飛去上海，正式長駐內地出任中國區消費金融業務總裁，佢尋日話對於今次新挑戰已經做好準備。喺內地做嘢，首要當然喺練好「煲冬瓜」（普通話），Simon話已加緊操練，特別係啲港式用語要轉做白話文，例如「彈性」改做「靈活性」等等，上星期佢出席長沙分行開幕時，更一次過用煲冬瓜致詞，相信煲冬瓜對佢嚟講無乜難度。不過都有嘢難到佢嘅，就係內地食飯應酬時好鍾意飲酒助興，自言酒量非常一般嘅佢都要諗計可以點應對喎！

相信近排Simon會好唔得閒，事關唔少同事朋友排住隊同佢餞行，佢話之前先同金管局副總裁阮國恒食飯敍舊，又去咗上海、北京同當地嘅監管機構見面「打招呼」。香港同上海其實好近啫，而Simon亦計劃每個月都回港一次，日後仲有大把機會見面嘅。