政情：廢噏跨境求學 唐唐搭錯線

跨境學童嘅問題纏繞香港逾十年，但政府遲遲冇對症下藥。近年跨境學童數字年年攀升，但政府仲減發便利跨境學童過境來港返學嘅禁區紙，令原本已經唔理想嘅情況更加嚴峻。平時做嘢「條條fing」嘅政務司司長唐唐，日前終於姍姍來遲走訪邊境學校，聲言要做「實地研究」，仲向邊境學校拋下佢嘅「高見」，矢言要解決問題。

唔明家長捧名校心態

話說唐唐早幾日走訪羅湖同上水兩間邊境小學，了解下內地居住嘅港人子弟如何求學。聽講佢走訪學校時相當亢奮，仲向邊境學校滔滔不絕發表高見，建議以後喺深圳起多幾間學校，等內地港人子弟可以喺就近入學，唔使再每日萬里長征，希望可以紓緩到現時嘅情況喎，講到自己好順得人意咁。

之不過，唔少學校代表聽完唐唐呢個建議，無不咋舌兼O晒嘴，覺得佢完全搭錯線。佢哋舉例話，即使係居於新界嘅家長，都會推啲仔女去九龍讀書，唔明白點解唐唐身為掌管人口政策嘅司長，竟然完全唔明白家長追捧名校嘅心態，「家長心儀嘅學校喺邊，佢哋就去邊o架啦，點會理遠近o架！」

有邊境學校教員認為，內地港人係欣賞本港嘅教育制度，先會堅持要子弟日日跨境上學，故無論唐唐喺內地起多幾多間學校，都係無補於事，直言政府應針對跨境學校上學嘅安全問題做配套，例如安排點對點嘅校巴服務，先係改善問題嘅上策。

就因為唐唐捉錯用神，所以一場親民騷，最後演變成露底爛騷，反映佢有幾天真、幾傻，呢次真係偷雞唔到蝕把米。睇嚟佢都係飲少啲紅酒，多啲落區睇民情，先好再發表偉論啦！