政情：嘉能可經紀好搵過投行
國際投行經紀高薪厚職，一向受人羨慕，但近年商品資源有價，從事石油同貴金屬交易嘅經紀更加好搵，年薪可以係投行經紀嘅兩倍，就以下月係英港兩地上市嘅商品巨擘嘉能可為例，佢旗下超過二千五百位交易員同後勤人員平均年薪加花紅四十萬美元。而嘉能可最近仲搵咗前和黃大班馬世民擔任非執行主席添！
睇番嘉能可嘅招股書，佢一班sales搵嘅人工，不但係巴克萊嘅兩倍，而且喺嘉能可上市後，為免公司重要資產嘅前線人員流失，仲可能再加薪，做普通嘅前線銷售待遇已經如此，公司四百八十五位合夥人當然更和味，除咗人工同花紅外，合夥人仲可以攞到紅股，雖然合夥人以往都可以攞到紅股添。
嘉能可早前仲搵咗前和黃大班馬世民擔任非執行主席。 （資料圖片）