政情:肥根告御狀明摑煲呔曾

仲記得喺年初嘅答問大會,立法會漁農界代表「肥根」黃容根當面向煲呔曾發炮,話新界西大興土木導致漁業失收,點知佢幫手為漁民追討賠償時就畀政府部門當波咁踢,佢點名鬧晒食物及衞生局同運輸及房屋局後,仍然係冇人理佢,相當冇癮。

立法會開始討論禁止拖網捕魚嘅條例草案,業界當然牙痛咁聲,覺得政府明玩針對。畀人恰到上面,肥根惟有「漁人自救」,前日帶埋班捕撈漁業、海魚養殖業、禽畜業等代表殺上北京訪問四日,期間拜訪國家農業部。名義上係反映對香港漁業發展嘅意見,實際上就係告御狀,希望北京可以畀啲壓力特區政府,唔好當漁農界冇到!

肥根話漁農業係第一產業,亦係維持香港「美食天堂」美譽嘅食材供應群體,點知喺特區政府嘅政策下,漁農業冇資助不特止,仲要畀政府以種種理由,例如環保、衞生、城市發展等等藉口嚟縮減發展規模,好似之前收回贖買生豬同家禽養殖戶牌照,或者研究緊禁止於海洋公園同地質公園水域捕魚嘅政策,都係將漁民、農民趕盡殺絕。

打救港漁農業

佢仲話香港漁農業同內地有着密不可分嘅關係,因為好多本港漁民農民,都有喺內地從事捕撈同開辦農場,但內地仲係當本港漁民農民係外資企業,冇辦法享受內地漁農業發展相關政策帶嚟嘅機遇。正所謂唇亡齒寒,佢希望內地政府可以同港府相關部門設立恒常溝通機制,方便處理業界問題,以及建立反饋機制,一旦有突發事件發生時亦可以處理。

其實除咗肥根講嘅好處,兩地加強合作仲有一個益處,就係對特區政府構成無形壓力,做嘢都快手啲。

「Money18免費即秒股票報價網站」現推出8升級功能,財經資訊,實時實發!

設計圖片