政情：睇太陽報捐近4000萬楊釗家族助愛滋病患

向來鍾意做善事嘅「牛仔褲大王」楊釗，原來成個家族喺七年內共捐近四千萬元予「中國愛滋病防治行動香港委員會」。能夠促成呢件美事，除咗班熱心者外，就因為《太陽報》嘅報道先可令遠在美國嘅楊釗哥哥楊洪認識呢個組織，因而落力捐錢幫助內地愛滋病防治工作。

聯絡何大一 表示想幫手

○四年成立嘅中國愛滋病防治行動香港委員會，七年來共籌得七千八百萬元，當中有一半係嚟自楊釗家族。話說○四年《太陽報》報道咗香港委員會成立嘅事，當時遠在美國嘅楊洪睇到篇報道，覺得好有意義，馬上聯絡咗呢個會嘅聯席主席、愛滋病專家何大一醫生，表示想幫手出一分力。七年以來，楊氏家族除咗現金資助之外，仲身體力行去支持添！

楊洪囝囝David楊駿業、兩位聯席主席何大一同梁智鴻，仲有副主席「媽打」李麗娟尋日一齊出席記者會。○五年開始出任香港愛滋病基金會董事嘅David，○三年回流香港，佢話因為爸爸經常要周圍飛，所以佢代父出力，到內地愛滋病嘅重災山區探訪，身邊嘅商界朋友見佢咁熱心，都紛紛出錢又出力，同佢兩公婆一齊返去探望病患者。

David話愛滋病唔止係病咁簡單，仲係一個社會問題，因為患者仲有活動能力，仲需要工作，但社會存在歧視，令到佢哋唔可以融入正常生活，加上要負擔醫療開支，所以好需要幫助。楊家嘅「慈輝佛教基金會」仲捐咗一批電單車出嚟，等醫生揸住兩個輪去救人更有效率。

順道一提，嚟緊六月佢哋會舉行慈善首映，邊齣戲？咪就係由郭富城同章子怡主演、探討愛滋病話題嘅《最愛》囉！