政情：李國英四年抱四孫
沙田好快就會多個景點，事關位於石門嘅鄉議局新大樓即將開幕，呢間耗資近兩億元、仿照傳統四合院設計嘅新大樓，當中包括可以容納到一千三百人嘅大劇院，仲有禮堂、演奏廳、展覽廳、會議室、活動室等等，會開放畀巿民租用，真係聽見都盞，而頭啖湯就畀大埔鄉事委員會搶咗。
事關嚟緊六月大埔鄉委會會舉行新一屆新職典禮，所以佢哋已經率先book咗喺呢度大排筵席，與眾同樂。依家正為十一月區議會選舉備戰而勤於落區嘅大埔區議員李國英，透露依家大樓正諗緊開多一間走高檔路線嘅餐廳，但中西式就仲未定。若果新鄉局大樓開埋餐廳嘅話，大樓對外開放嘅設施就更全面，收益亦會用嚟支付大樓嘅營運經費。
講開又講，李國英自從冇做立法會議員之後，除咗做地區工作外，就係飛過英國湊孫，事關佢對仔女四年抱四，認真幸福。
