政情：曾鈺成反口高調撐政府
立法會主席曾鈺成上任前曾作出「三不承諾」，包括不投票、不出席建仔黨團會議同不作引起議員辯論嘅評論，但佢尋日出席論壇時卻不惜為保皇破戒，撇低佢應有嘅中立身份，高調撐政府派錢，更同在場學者舌戰。
曾鈺成話唔覺得派錢有乜嘢錯，既然政府今年比預算多出咁多「意外」盈餘，派畀市民並冇大不了。期間有學者同區議員均指派錢無助解決問題，亦得唔到市民支持，惟曾鈺成死撐反駁話每次落區都聽到班街坊支持派錢，想知幾時先收到喎。佢事後唔認自己言論有違反「三不」，強調自己只係引述他人言論同鋪陳事實喎。