政情：新華網鬼祟出稿刪稿

內地異見藝術家艾未未被公安秘密扣查已逾一個禮拜，至今仍杳無音訊，官方更從未有公開交代事件，唯一喺官方媒體新華社同新華網出稿指艾未未涉及經濟犯罪，但全程鬼祟，都唔知搞乜。

艾未未下落不明之後四日，新華社上禮拜四凌晨十二點幾發出段英文新聞稿，新華網亦有發稿，指艾未未涉及經濟犯罪，但網上嘅新聞稿出咗幾分鐘竟又被刪去，冇人知發生乜嘢事，看似神秘、又好鬼祟，其實係兒戲。

新華社同新華網今次出稿實疑點重重。首先，佢哋作為內地官方媒體，點解處理艾未未呢個咁敏感嘅議題時，何以只發英文稿，而唔發中文稿？其次，點解新華網出稿冇耐又旋即將段稿刪走？究竟係搞錯、係內地未傾掂數，定有人惡作劇？

立法會議員張文光認為，發英文稿明顯係有意將消息透過微博發出，目的要消解以美國為首嘅國際壓力，但係段稿發出之後又刪去，之後冇晒下文，明顯係搵唔到艾未未嘅罪名，成件事簡直係笑死人，為今之計，北京只能立即放人。