政情：搞搞政：潘偑璆話「追龍」無著數

醫管局日前就內地孕婦來港產子截龍，望可紓緩壓力爆煲嘅公立醫院婦產科服務，但撞正出年「龍年效應」，傳統上係生仔高峰期，勢必令公院服務雪上加霜。

立法會一個委員會尋日討論有關問題時，議員李華明就千叮萬囑政府，千祈唔好睇小「龍年效應」嘅威力，話每逢龍年都一定特別多人想生小朋友，仲自爆自己當年結婚後，都同太太等足三年，專登校啱喺龍年生「龍女」，對上一次龍年就比其他生育年份多咗幾千個小朋友出世，希望當局唔好掉以輕心。

不過，另一位議員潘佩璆就似乎對子女生肖冇乜偏好，仲大唱反調呼籲市民唔好一窩蜂去「追龍」，即係唔好揀喺龍年生育。佢話如果同一年有特別多小朋友出世，即係意味個小朋友日後要同多啲人爭住入名校，畢咗業就要爭住搵工，成世人都同人爭崩頭，實在制唔過咁話。

其實班議員講咗咁多，都係想嗌醒後知後覺嘅政府，明知出年一定會多BB出世，應該趁早做好準備。班高官收到未？